کوشتنه‌وه‌ی په‌له‌وه‌ره‌کان، هه‌موومان دیتومانه چۆن به ملی قوتی بڕاوه‌وه به‌رده‌بن و خوێنفچقان سه‌ر له جێگایه‌ک که‌تووه و له‌شیش به‌ره‌و نادیار چه‌ند هه‌نگاوێک راده‌کات. ئه‌م دیمه‌نه هه‌ر منداڵێک بیبینێ چزه به روحیه‌وه ده‌نێ. زۆر له منداڵانیش گۆشتی ئه‌و په‌له‌وه‌ره ناخۆن که له‌به‌ر چاویان سه‌ربڕابێت.
با نموونه‌یه‌کی زیندوو له‌سه‌ر کوشتنه‌وه‌ی گیانداران و هاندانی تووندوتیژی بێنمه‌وه. یه‌کێک له رووداوه توندوتیژه هه‌ره دڵڕه‌ق و قێزه‌وه‌ره‌کانی ناو کۆمه‌ڵگای کوردستان، کرداره‌کانی بانده مرۆڤکوژ و تیرۆریستییه‌که‌ی شێخ زانایه که له هه‌ولێر روویدا. ئه‌و بانده ئیسلامییه تووندڕۆیه له ساڵی 2005 ده‌سگیر کران و ئیعتڕافه‌کانیان له راگه‌یاندندا بڵاوکرایه‌وه. ئه‌وانه له‌سه‌ر کاسێتی ڤیدیۆیی هه‌موو کرده‌وه‌کانی خۆیان تۆمار کردبوو. ئه‌وان له پڕۆڤه‌ی سه‌ربڕینی مرۆڤدا، جاری یه‌که‌م مه‌ڕیان به لایه‌نگرانی خۆیان سه‌رده‌بڕی و تۆماریان ده‌کرد و دوایی بۆیان نمایش ده‌کردنه‌وه تا وه‌ک شێخ زانا خۆی ده‌یگوت باشتر ده‌ستیان رابێت. ئینجا له قۆناغێکی دیکه‌دا مێرمنداڵی سه‌ر شه‌قامه‌کانیان ده‌دزی و دیسان بۆ پڕۆڤه‌کردن وه‌ک هه‌مان مه‌ڕ و به‌ده‌ستی هه‌مانکه‌س سه‌ریانده‌بڕین و دیسان دوای تۆمارکردن بۆ بکوژه‌که‌یان نمایش ده‌کرده‌وه تاکو له قۆناغی دواییاندا نه‌یاره ده‌ستنیشانکراوه‌کانیان به‌بێ ده‌ربه‌ستی بکوژنه‌وه!
له‌و نموونه‌یه‌دا ده‌رده‌که‌وێت کوشتنی گیانداران چۆن هانی کوشتنی مرۆڤه‌کانیش ده‌دات و ده‌بێته تاقیگا بۆ توندوتیژییه‌کانی ناو کۆمه‌ڵگای مرۆڤایه‌تی.
هه‌ڵبه‌ت ئه‌وه خواردنی گۆشته ده‌بێته هۆی سه‌ربڕینی گیانداران، ئه‌و خواردنه‌ی هه‌ر له بنه‌ڕه‌ته‌وه له نه‌زانی و ناچاری مرۆڤی جاهیل له پڕۆسه‌ی پێگه‌یشتنی خۆیدا ده‌ستیدایه. خواردنێک که له‌گه‌ڵ سیسته‌می جه‌سته‌یی سروشتی مرۆڤدا ناکۆکه و بۆی ده‌بێته مایه‌ی زیانێکی ته‌ندروستی و مه‌سره‌فێکی زۆری مادی. وه‌ک دیاره مرۆڤ ناتوانێ راسته‌وخۆ گۆشت بخوات چونکه نه جه‌سته‌ی قبوڵی ده‌کات و نه ده‌روونی تامی لێده‌بینێ و نه ده‌ست و ددانیشی توانایی پچڕینی ماسولکه‌کانی گۆشتی له‌شی گیاندارانیانهه‌یه. بۆیه ناچاره به چه‌ک و که‌رسته‌ی جۆراوجۆر گیانداره‌که بکوژێ، ئینجا به ئاگر گۆڕانی تێدا بکات و به خوێ و خۆراکی گیایی دیکه تام و چێژی بگۆڕێ ئینجا بیخوات. پێویسته مه‌سره‌فێکی زۆریش له تکنیکی پاراستن و هه‌ڵگرتنی گۆشتدا بکات تا بۆگه‌ن نه‌بێت، هه‌روه‌ها تکنیکێکی زۆری دیکه‌ش به‌کاردێنێ تاکو به‌شیوه‌ی جیا جیا زوو لێیبنێ دیسان تا بۆگه‌ن نه‌بێت. وه‌ک دیاره جه‌سته‌ی گیانله‌به‌ران دوای له‌کارکه‌وتنی ئۆرگانیزمی له‌شیان، خێرا بۆگه‌ن و شیته‌ڵ ده‌بێ و لێکهه‌ڵده‌وه‌شێ. هه‌ر له‌به‌ر هێندێشه‌مرۆڤی مردوو، زوو له گۆڕ ده‌نێن. ئه‌وه به‌پێچه‌وانه‌ی به‌رهه‌مه رووه‌کیه‌کانه که تا ماوه‌یه‌کی زۆر ده‌میننه‌وه و بۆگه‌ن نابن.
راستییه‌کی دیکه هه‌یه، گیانله‌به‌ر هه‌رکه مرد، به پله‌ی جیا جیا، بۆگه‌نی ده‌ستپێده‌کات. بۆیه هیچ گۆشتێک نیه تا پله‌یه‌کی دیاریکراو بۆگه‌نی نه‌بووبێت. به‌م چه‌شنه له هه‌موو حاله‌تێکدا خواردنی به گۆشت مه‌کۆی باکتریا و میکڕۆف و ڤایرۆسی ترسناک و جۆراوجۆرن. هه‌ر ئه‌وه‌شه به تاکه خواردنی هه‌ڕه‌شه‌دار له‌سه‌ر ته‌ندروستی مرۆڤ داده‌ندرێ. گۆشت که‌ناڵی گواستنه‌وه‌ی خوێ و چه‌ورییه زیانمه‌نده‌کانه بۆ ناو له‌شی مرۆڤ. که‌چی خواردنه رووه‌کییه‌کان خۆیان هه‌ڵگری خوێی سروشتین و له‌کاتیلێنانیشدا خوێی زیاده قبوڵ ناکه‌ن. بۆ چه‌وریش هه‌روان. بۆیه ئه‌و که‌سانه‌ی گۆشت ناخۆن ده‌زانن خواردنه گۆشتییه‌کان چ بۆگه‌نیوێکیان لێدێت. لێره‌دا ئه‌و قسه‌یه‌ی سادقی هیدایه‌ت راستی خۆی ده‌سه‌لمێنێ که ده‌یگوت؛ گۆشت وه‌ک مه‌ی و تریاک وروژێنه‌ر(مهیج)ی ده‌زگای هه‌رسکردنی مرۆڤه، وه‌ک ماده سڕکاره‌کانیش(مخدرات) سیسته‌می عه‌سه‌بی راده‌هێنێ و موعتادی(ادمان) ده‌کات. ئه‌وه‌یه بۆگه‌نیویه‌که‌ی هه‌ست پێناکات.
سه‌رباری ئه‌و قسه راستانه‌ی سادقی هیدایه‌ت، ئینجا هیچ که‌س نیه بۆنی گۆشتی خاوی پێخۆش بێت، هه‌ر ئه‌وه‌شه قه‌سابخانه‌کان پیسترین و بۆن ناخۆشترین شوێنی شارن، له نه‌خشه‌ی شاره‌کاندا کوشتارگاکان ده‌خرێنه ده‌ره‌وه‌ی شار، رێک وه‌ک زبڵخانه‌کان.
زیانی خواردنی گۆشت ته‌نیا له‌به‌ر کاردانه‌وه خراپه‌کانی بۆسه‌ر ته‌ندروستی و ده‌روونی مرۆڤ نیه، به‌ڵکو خودی گیاندارانیش ئه‌و روانگایه ده‌یانگرێته‌وه که پێیوایه روح به‌نرخترین به‌هایه و به هیچ شتێکی دیکه به‌رابه‌ر و قه‌ره‌بوو ناکرێ. ئه‌وانیش گیانیان هه‌یه و مافی خۆیانه که به‌بێ مه‌ترسی بژین. گیانداره‌کانیش به پله‌ی جیا،هه‌ستیان هه‌یه و تام له ژیان ده‌به‌ن و هه‌ست به ئازار ده‌که‌ن به ره‌فتاری کارده‌ره‌وانه به ده‌نگ و جوڵه و راکردن و په‌لاماردان و لاواندنه‌وه، ئه‌وه‌ده‌رده‌خه‌ن.
ده‌زانم له کۆمه‌ڵگای کوردستاندا زۆربه‌یان گاڵته‌یان به‌م بیرانه دێت، چونکه له‌وانه‌یه به‌م بیانگه‌یه وه‌ڵامم بده‌نه‌وه که تا ئێستا پاراستنی گیانی مرۆڤه‌کان له‌ده‌ست چه‌وسانه‌وه‌ی نه‌ته‌وه‌یی و نابه‌رابه‌ریی دابین نه‌کراوه چجای بیرکردنه‌وه له ئاژه‌ڵ وپه‌له‌وه‌ر! ئه‌وه‌ی من باسی ده‌که‌م په‌یوه‌ندی به جه‌وهه‌ری مرۆڤایه‌تییه‌وه هه‌یه و کۆمه‌ڵگایه‌کی هێمن و ئارام و پڕ ئاسایش و پێشکه‌وتوو دروست نابێ ئه‌گه‌ر خۆی به بیروباوه‌ڕی ئینسانی زۆر به‌رز و باڵا ته‌یار نه‌کات.
هاوڵاتیانی کوردستان ته‌مایانناوه کێبه‌رکێ له‌سه‌ر ره‌گه‌زه‌کانی پێشکه‌وتن بکه‌ن و وڵاتێکی نموونه‌یی له رۆژهه‌ڵاتی ناوه‌ڕاست بنیاد بنێن که تیایدا به‌ها مرۆڤایه‌تییه‌کان سه‌رده‌رانه‌ی هه‌ر ماڵێک دابپۆشێت. ئه‌و گه‌له‌ی مێژووی به خوین نوسراوه‌ته‌وه پێویسته له داهاتویدا ره‌نگ و بۆنی خوێن نه‌هێڵێ.
کوردستان سه‌رزه‌مینی چیا و روبار و ده‌شتی به‌پیته، مێژوویه‌کی درێژی له کشتوکاڵ و ئاودێری و به‌خێوکردنی ئاژه‌ڵ و په‌له‌وه‌ردا هه‌یه و به‌روبوومه‌کانیان ده‌کاته ته‌واوکه‌ری به‌رهه‌مه کشتوکاڵییه‌کانی خۆی. که‌لتووری ئه‌م وڵاته پڕه له ره‌گه‌زی به‌زه‌یی هاتن به گیانداران، ئه‌وه‌ش له سروشتی ژیانی گه‌لانی چیاییدا ره‌گه‌زێکی هاوبه‌شه. بیروڕا و ئه‌ده‌بی ئینسانییانه‌ی عیرفان و سۆفیایه‌تی پڕه له‌و ئامۆژگاری سه‌باره‌ت به پاراستنی گیانداران یان زیاده‌ڕۆیی نه‌کردن له کوشتنیاندا.
ئه‌و ناوچانه‌ی ناوه‌نده عیرفانیه‌کانی لێبووه، هه‌میشه گیانداران و داروده‌وه‌ن پارێزراوتر بوون له شوێنه‌کانی دیکه. نموونه‌ی ئه‌م رایه‌نه‌م به ناوچه‌ی بارزان دێنمه‌وه که پێشه‌نگه له پاراستنی گیانداران و داروده‌وه‌ن.
نوسینی: سه‌رۆ قادر
کوشتنی گیانداران هاندانێكه بۆ کوشتنی مرۆڤه‌کان
'shex zana'
,
بیروڕا
,
سهرۆقادر، شێخ زانا، گۆشت، ڕوهكخۆر، ئیسلام، تیرۆر، دهرونی، مرۆڤایه‌تی، خواردن، كوشتن
,
islamic
,
kill
,
kurd
,
meat
,
psycho
,
roakhor
,
roakxor
,
ruakxor
,
rwakxor
,
terrorist
,
vegan
ده‌ستكاریكردن
0 كۆمێنته‌كان :
إرسال تعليق