مرۆڤ ئه‌و مافه‌ی به‌خۆی داوه له روانگای به‌رژه‌وه‌ندی خۆیه‌وه ته‌ماشای جیهان بکات. ئه‌و روانگایه‌ی له‌وێڕا دێ که خاوه‌نی هۆش و عه‌قڵه و ده‌توانێ سامانه‌کانی سروشت بپارێزێ،
هه‌روه‌ها به تواناییه عه‌قڵییه‌که‌ی ده‌شیێ پێکهاته‌ی سه‌ر گۆی زه‌وی بپارێزێ، وێڕای که‌ڵک وه‌رگرتن له تێکڕای سامان و بوونه‌وه‌ره‌کانی بۆ به‌رژه‌وه‌ندی خۆی. ئه‌وه روانگایه‌کی راسته. به‌ڵام له شیکردنه‌وه‌ی مافی مرۆڤ له‌و که‌ڵکوه‌رگرتن و ده‌ستێوه‌ردانی سروشت، نابێ پشت به‌و باوه‌ڕ و داب و نه‌رێتانه ببه‌سترێ که له کاروانی پێگه‌یشتنی مرۆڤایه‌تیدا له قۆناغێکی دیاریکراودا هاتوون.
ئه‌گه‌ر ئه‌و دابه‌نه له‌وکاتدا پاساوی خۆیان هه‌بووبێ یان به‌پێچه‌وانه‌وه له‌و باوه‌ڕ و داب و کرده‌وانه ده‌ژمێردرێن که به‌شه‌ر تیایدا نه‌زانی (جه‌هل) و دڕندایه‌تی به‌کارهێناوه، له قۆناغه‌کانی دیکه‌ی پێشکه‌وتندا وه‌ک هه‌ر چاکسازییه‌کی دیکه ده‌کرێ به‌لاوه‌بنرێن.
کوشتنی گیانداران له‌و باوه‌ڕه جه‌هلیی و کرده‌وه دڕندانانه‌یه که مرۆڤ نابێ له‌سه‌ری به‌رده‌وام بێت، هه‌روه‌ک چۆن له‌سه‌ر کوشتن و خواردنی گۆشتی بنیاده‌م به‌رده‌وام نه‌بوو، له بڕوا کۆمه‌ڵایه‌تییه‌کان و ئاینه‌کاندا قه‌ده‌غه و حه‌رامی کردن.
کۆمه‌ڵگای جیهانی، به‌رده‌وام بۆ دۆزینه‌وه‌ی رێگاچاره‌ی مه‌نتقی و واقعیی کێشه بنه‌ڕه‌تییه‌کانی گێتی له‌کاری جدیدا بووه و هه‌نگاوی زۆر گه‌وره‌ی هاویشتووه که گه‌شبینی به ئاینده‌ی مرۆڤایه‌تی راسته‌قینه ده‌دات. پێشکه‌وتنی فکر و تکنۆلۆژیا توانایی به مرۆڤ داوه تا ئه‌لته‌رناتیف(بدیل) بۆ ئه‌نجامی کرده‌وه دزێو و دڕنده‌ییه‌کانی پێشوو پێشکه‌ش بکات، به‌مه‌ش ناوه‌رۆکی ئینسانییه‌تی قوڵتر کردۆته‌وه. ده‌بێ گه‌شبین بین که له‌م رۆژگاره‌دا کۆیله‌یی، نه‌ژادپه‌رستی،نه‌زانی،برسێتی و نه‌خوێنده‌واری موتڵه‌ق له به‌شێکی فراوانی دنیا،داگیرکاری، کۆڵۆنیالیزم، جه‌نگی جیهانی نه‌ماون. ئه‌وانه گشتیان له‌سه‌ر بنچینه‌ی باوه‌ڕی خوڕافاوی و نه‌زانی و ره‌فتاری دڕنده‌یی ده‌کران، که‌چی له‌مڕۆژگاره‌دا به شه‌رم و نه‌نگ داده‌ندرێن و عه‌قڵی ئه‌مڕۆ بۆ ساتێکیش قبووڵیان ناکات. بایه‌خدان به سه‌وزایی جیهان و بوژاندنه‌وه‌ی جه‌نگه‌ڵه‌کان و پارێزگاریکردن له به‌رده‌وامی نه‌ژادی ئه‌و گیاندارانه‌ی له قڕبوون نزیک که‌وتبوونه‌وه، هه‌وڵدان بۆ پاک راگرتنی ژینگه و ده‌ریاکان و پاراستنی گیاندار و رووه‌که ده‌ریاییه‌کان ئه‌وانه هه‌مووی تا چه‌ند ده‌یه له‌مه‌وبه‌ر خه‌یاڵ بوون.
له‌لایه‌کی دیکه کۆتاییهێنان به سته‌م و چه‌وساندنه‌وه‌ی ئافره‌تان و منداڵان بووه‌ته غه‌می هه‌موو جیهانیان و له پێناویدا هه‌موو باوه‌ڕ و سیسته‌مێک به دینیشه‌وه ده‌سکاری و چاک ده‌کرێن. بۆیه زۆر ره‌وا و ئینسانییانه‌یه کوشتنی گیاندارانیش قه‌ده‌غه بکرێ. له هه‌مانکاتدا سه‌رمایه‌یه‌کی شایان بۆ رۆشه‌نگه‌ری و تێگه‌یاندن و په‌روه‌رده کردنی دانیشتوان بۆ ئه‌م ئامانجه، ته‌ر‌خان بکرێ. ئافره‌تێک ئه‌گه‌ر بزانێ کوشتنه‌وه‌ی به‌رخێک یان مریشکێک ژانی وه‌ک سه‌ربڕینی منداڵێکه، هه‌روه‌ها تێبگه‌یه‌ندرێت که دیمه‌نی کوشتنه‌وه‌و خواردنی گۆشته‌که‌ی چۆن ده‌روونی منداڵه‌که‌ی ده‌شێوێنێت و ره‌فتاری تووند و لاساری و لاوازی سایکۆلۆجی بۆ ده‌خوڵقێنێ، زۆر به ئاسانی ده‌ست له گۆشتخواردن هه‌ڵده‌گرێ و دژی کوشتنی گیانداران ده‌وه‌ستێ و منداڵه‌که‌شی هه‌روا په‌روه‌رده ده‌کات. له‌وه ئاسانتر، ئه‌گه‌ر هه‌مان ئافره‌ت رێنوێنی بکرێ که‌وا خواردنه غه‌یره گۆشتییه‌کان چه‌ند ئاسان و زۆرن و تکنۆلۆژیا و زانست به‌رهه‌مه رووه‌کییه‌کانی چه‌ند زۆر و ئاسان و هه‌رزان کردووه، ئامانجه‌که‌ش ئاسانتر ده‌بێت
نوسینی: سه‌رۆ قادر
0 كۆمێنته‌كان :
إرسال تعليق